CSI Events‎ > ‎

Untitled Post

posted Apr 23, 2018, 10:58 PM by media csi
پڕۆژەیەک لە بوارى خوێندنى باڵا بە بڕى یەک ملیۆن یۆرۆ دەچێتە بوارى جێبەجێکردنەوە


بەئامانجى جێبەجێکردنى پڕۆژەى (تاگرس)، بۆ بەنێودەوڵەتیکردنى ژمارەیەک لە زانکۆکانى کوردستان، سەرپەرشتیارى پڕۆژەکە گەیشتە کوردستان و، لەگەڵ وەزارەتى خوێندنى باڵا و توێژینەوەى زانستى کۆبوەوە.

لەو کۆبونەوەیەدا، کە ڕۆژى چوارشەممە، رێکەوتى (٤/٤/٢٠١٨) لە دیوانى وەزارەت بەڕێوەچو، د.کەریم ساڵح عەبدول ڕاوێژکارى وەزیرى خوێندنى باڵا و توێژینەوەى زانستى بەناوى د.یوسف گۆران وەزیرى خوێندنى باڵا و توێژینەوەى زانستى بەخێرهێنانى د. ئوو موس بەڕێوەبەرى پەیوەندییە نێودەوڵەتییەکانى زانکۆى (جۆرج ئۆگه‌ست گوتینگن)ی ئه‌ڵمانی سەرپەرشتیارى جێبەجێکردنى پڕۆژەى (تاگرس) و وەفدى هاوڕێى کرد.

لە کۆبونەوەکەدا، کە هەریەک لە د.خەتاب شێخانى بەڕێوەبەرى گشتى دیوانى وەزارەت و، د.جوان جەلال شەریف بەڕێوەبەرى گشتى فەرمانگەى نێردراوان و پەیوەندییە رۆشنبیرییەکان ئامادەیبون، ڕاوێژکارى وەزیرى خوێندنى باڵا و توێژینەوەى زانستى کورتەیەکى لەبارەى دۆخى خوێندنى باڵا و توێژینەوەى زانستى پێشکەش بە وەفدى میوان کرد، هەروەک خۆشحاڵى وەزارەتیشى پیشاندا بەجێبەجێکردنى پڕۆژەى بەنێودەوڵەتیکردنى زانکۆکانى کوردستان.

هەر لەو کۆبونەوەیەدا، ئامادەبوانى وەزارەتى خوێندنى باڵا و توێژینەوەى زانستى باسیان لە گرنگى جێبەجێکردنى پڕۆژەى بەنێودەوڵەتیکردنى زانکۆکانى کوردستان، هەروەک باسیان لە چۆنیەتى پاڵپشتیکردن و هاوکاریکردنى وەزارەت بەتایبەت لە پێداچونەوە بە رێنماییەکانى پلەبەرکردنى نازناوى زانستى، لەهەمان کاتدا تیشک خرایە سەر جێبەجێکردنى پڕۆگرامى ئاڵوگۆڕکردنى خوێندکارانى خوێندنى باڵا بەتایبەت دکتۆرا و پێدانى بڕوانامەى هاوبەش (جوین دگرى) لە نێوان زانکۆکانى هەرێمى کوردستان و زانکۆکانى ئاڵمانیا بەسیستمى سپلیسایت، باسیش لە پڕۆگرامەکانى خوێندن لە سێنتەرەکانى توێژینەوەى زانستى کرا بەتایبەت دامەزراندنى سێنتەرى توێژینەوە بەشێوازى گشتى یاخود تایبەت بەپێیى پسپۆڕییەکان.

لە بەرامبەردا، د. ئوو موس بەڕێوەبەرى پەیوەندییە نێودەوڵەتییەکانى زانکۆى (جۆرج ئۆگه‌ست گوتینگن)ی ئه‌ڵمانی سەرپەرشتیارى جێبەجێکردنى پڕۆژەى (تاگرس) و ئەندامانى وەفدەکە خۆشحاڵى خۆیان بەو سەردانە بۆ کوردستان دەربڕی، وتیشى هەنگاو بەهەنگاو پەیوەندییە زانستى و ئەکادیمیەکانمان لەگەڵ وەزارەتى خوێندنى باڵا و توێژینەوەى زانستى و زانکۆکان بەرەوپیش دەچێ، هیواشى خواست کردنەوەى ئۆفیسى پەیوەندییە دەرەکییەکانى زانکۆکەیان لە کوردستان ببێتە دەروازەیەکى گرنگ بۆ فراوانکردنى ئاستى پەیوەندییەکان، هەر لە میانەى قسەکانیدا سەرۆکى وەفدەکە باسى لە گرنگى جێبەجێکردنى پڕۆژەى بەنێودەوڵەتیکردنى زانکۆکانى کوردستان کرد، کە لەلایەن یەکێتیى ئەوروپاوە بڕى یەک میلۆن دۆلارى بۆ تەرخانکراوە، ئەو پڕۆژەیەشى بەدەسکەوتێکى زانستى گرنگ بۆ زانکۆکانى کوردستان وەسفیکرد.

دوا بەدواى کۆبونەوەیان لەگەڵ وەزارەتى خوێندنى باڵا و توێژینەوەى زانستى، وەفدى زانکۆى (جۆرج ئۆگه‌ست گوتینگن)ی ئه‌ڵمانی سەردانى زانکۆى سەڵاحەددینیان کرد، پاشانیش قەڵاى دێرین و قەیسەرى هەولێریان بەسەرکردەوە.

ئەمرۆ پێنچ شەممە، ڕێکەوتى (٥/٤/٢٠١٨) لە دەستەى کوردستانى بۆ دیراساتى ستراتیجى و توێژینەوەى زانستى لە مەراسیمێکدا، کە بەئامادەبونى د.خەتاب بەڕێوەبەرى گشتى دیوانى وەزارەت و، سەرۆکى ژمارەیەک لە زانکۆکانى کوردستان ئامادەیبون، لە مەراسیمێکدا ئؤفيسى پەیوەندییە نێودەولەتیەکانى زانکۆى (جۆرج ئۆگه‌ست گوتینگن)ی ئه‌ڵمانی کرایەوە، وەک لە وتارەکانى مەراسیمى کردنەوەى نوسینگەکەدا باسى لێوەکرا، ئەو نوسینگەیە دەبێتە خاڵى پەیوەندى نێوان زانکۆکانى هەرێمى کوردستان و زانکۆکانى ئاڵمانیا.

پڕۆژەى (تاگرس)، پڕۆژەیەکى گرنگى بوارى خوێندنى باڵایە لە نێوان وەزارەتى خوێندنى باڵا و توێژینەوەى زانستى هەرێمى کوردستان و ئاڵمانیا، کە لەلایەن یەکێتیى ئەوروپا بڕى یەک میلۆن یۆرۆى بۆ تەرخانکراوە.

لە پڕۆژەکەدا، وەزارەتى خوێندنى باڵا و توێژینەوەى زانستى و دەستەى کوردستانى بۆ دیراساتى ستراتیجى و توێژینەوەى زانستى و زانکۆکانى (سەڵاحەددین/ هەولێر، سلێمانى، چەرموو، ڕاپەڕین، هەڵەبجە، زانکۆى پۆلیتەکنیکى هەولێر، سلێمانى و دهۆک) بەشدار دەبن، پڕۆژەکە تایبەت دەبێ بەدروستکردن و بەهێزکردنى تواناى مامۆستایان و بەنێودەوڵەتیکردنى زانکۆکانى کوردستان.

بۆیە جێبەجێکردنى ئەو پڕۆژەیە دەرگایەکى دیکە بەڕوى زانکۆکانى کوردستان دەکاتەوە بۆ بەرزکردنەوەى تواناى زانستى مامۆستایان و ئاشنابون بەپێشکەوتنەکانى جیهان، جگە لەوەش دەرفەتى خوێندنى باڵا/ ماستەر و دکتۆرا بۆ خوێندکارانى کورد لە زانکۆکانى ئاڵمانیا و چیک دەڕەخسێنێ.
Comments